Македонија доби прва Универзитетска ветеринарна болница, со која се зголемува квалитетот на здравствените услуги за животните. Болницата е опремена со современи апарати за дијагностика и за лекување. Се состои од стационар, хирушка сала, рендген, ЕХО, ЕКГ и три лаборатории: микробиолошка, паразитолошка и биохемиска.Покрај ова, сопствениците на домашни миленичиња ќе добиваат и упатства и совети како да се грижат за нив.

„Болницата ќе овозможи усовршување на академскиот кадар, но и поголема научноистражувачка дејност. Воедно ќе се создадат услови за изучување, помагање и лекување голем број животни, активности што досега Факултетот мораше да ги реализира во импровизирани услови или во договори со надворешни институции“, изјави министерот за образование и наука Панче Кралев по отворањето на болницата.

„Во нашиот Закон за ветеринарнатo здравство, ветеринарната болница е дефинирана како институција во која можете да добиете, од прием, тријажа, оперативни зафати, па до болничко стационирање на пацинетите. Болницата ќе овозможи и решавње на проблемите со плодноста кај миленичињата“, изјави проф. д-р Дине Митров, декан на Факултетот за ветеринарна медицина.

- Примарна цел нам не ни е економската сатисфакција, туку студентите, нивната обука и практичната настава. Тоа е неопходно за надворешна евалуација и акредитација кон европската асоцијација на ветеринарни факултети (ЕАЕVE), посочи Митров, додавајќи дека на Факултетот моментално има околу 400 активни студенти.

Според ректорот на универзитетот Св. Кирил и Методиј, Велимир Стојковски, ова е само уште една потврда дека се подобруваат условите за студирање во земјата.